Комплекс будынкаў 1-й клінічнай бальніцы (Мінск)
![](http://chped.net/https/upload.wikimedia.org/wikipedia/commons/thumb/5/57/Bundesarchiv_Bild_146-2004-236%2C_Minsk%2C_Lazarett.jpg/220px-Bundesarchiv_Bild_146-2004-236%2C_Minsk%2C_Lazarett.jpg)
![](http://chped.net/https/upload.wikimedia.org/wikipedia/commons/thumb/d/d7/Bro%C5%ADki_street_%28Minsk%29_p21.jpg/220px-Bro%C5%ADki_street_%28Minsk%29_p21.jpg)
![Ахоўная шыльда гісторыка-культурнай каштоўнасці Рэспублікі Беларусь.](http://chped.net/https/upload.wikimedia.org/wikipedia/commons/thumb/a/aa/Histvalue_sign_export.svg/10px-Histvalue_sign_export.svg.png)
Комплекс будынкаў 1-й клінічнай бальніцы размешчаны паміж вуліцамі Акадэмічнай, П. Броўкі і праспектам Незалежнасці, займае плошчу каля 10 га. Пабудаваны ў 1929—1931 гадах паводле праекта архітэктара Георгія Лаўрова як клінічны гарадок. Комплекс вырашаны на аснове павільённай сістэмы, пры якой ізаляваныя карпусы разлічаны на лячэнне пэўнага віду захворвання. Узведзены 4 карпусы для тэрапеўтычнай, хірургічнай, акушэрска-гінекалагічнай і скурна-венералагічнай клінік. У Вялікую Айчынную вайну найбольш пацярпеў чацвёрты корпус. Аднаўленне гарадка працягвалася з ліпеня да лістапада 1944 г. Пасля рэканструкцыі ў 1-м корпусе размясціліся тэрапеўтычная і хірургічная клінікі, у 2-м — клініка дзіцячых хвароб, у 3-м — акушэрска-гінекалагічная клініка. У гэты ж час пры бальніцы пачалі працаваць кафедра паталагічнай анатоміі, Інстытут пералівання крыві, рэспубліканская процівалляковая станцыя, анкалагічны дыспансер.
Характэрнай рысай комплексу з’яўляецца прастата планіроўкі і спрошчаная архітэктура, уласцівыя канструктывізму і функцыяналізму. Тэрыторыя клінічнага гарадка падзелена цэнтральнай алеяй-праездам на 2 амаль роўныя часткі. Уздоўж цэнтральнай алеі размешчаны 3 лячэбныя карпусы, пабудаваныя па адзінай планіровачнай схеме (3-і паверх акушэрска-гінекалагічнага корпуса падбудаваны ў 1938 г.). Левая частка плошчы гарадка адведзена пад зялёныя насаджэнні, там жа ў глыбіні ўчастка знаходзіцца трохпавярховы 4-ы корпус. Планіроўка ўсіх 4 будынкаў калідорная з аднабаковым размяшчэннем палат і балконамі. Пластыка фасадаў стрыманая.
![](http://chped.net/https/upload.wikimedia.org/wikipedia/be/thumb/f/f9/%D0%94%D0%B7%D1%96%D1%86%D1%8F%D1%87%D1%8B_%D1%85%D1%96%D1%80%D1%83%D1%80%D0%B3%D1%96%D1%87%D0%BD%D1%8B_%D1%86%D1%8D%D0%BD%D1%82%D1%80%2C_%D1%82%D1%8D%D1%80%D0%B0%D0%BF%D0%B5%D1%9E%D1%82%D1%8B%D1%87%D0%BD%D1%8B_%D0%BA%D0%BE%D1%80%D0%BF%D1%83%D1%81_%D1%96_%D0%BF%D0%B0%D0%BB%D1%96%D0%BA%D0%BB%D1%96%D0%BD%D1%96%D0%BA%D0%B0_%D0%BD%D0%B0_%D0%9B%D0%B5%D0%BD%D1%96%D0%BD%D1%81%D0%BA%D1%96%D0%BC_%D0%BF%D1%80%D0%B0%D1%81%D0%BF.jpg/220px-%D0%94%D0%B7%D1%96%D1%86%D1%8F%D1%87%D1%8B_%D1%85%D1%96%D1%80%D1%83%D1%80%D0%B3%D1%96%D1%87%D0%BD%D1%8B_%D1%86%D1%8D%D0%BD%D1%82%D1%80%2C_%D1%82%D1%8D%D1%80%D0%B0%D0%BF%D0%B5%D1%9E%D1%82%D1%8B%D1%87%D0%BD%D1%8B_%D0%BA%D0%BE%D1%80%D0%BF%D1%83%D1%81_%D1%96_%D0%BF%D0%B0%D0%BB%D1%96%D0%BA%D0%BB%D1%96%D0%BD%D1%96%D0%BA%D0%B0_%D0%BD%D0%B0_%D0%9B%D0%B5%D0%BD%D1%96%D0%BD%D1%81%D0%BA%D1%96%D0%BC_%D0%BF%D1%80%D0%B0%D1%81%D0%BF.jpg)
![](http://chped.net/https/upload.wikimedia.org/wikipedia/commons/thumb/4/41/Bro%C5%ADki_street_%28Minsk%29_p20_%E2%80%94_Hospital_No_1.jpg/220px-Bro%C5%ADki_street_%28Minsk%29_p20_%E2%80%94_Hospital_No_1.jpg)
3 канца 1960-х гадоў комплекс клінічнага гарадка паступова рэканструіруецца. У яго арганічна ўвайшлі новыя карпусы цэнтра дзіцячай хірургічнай дапамогі на 200 ложкаў і тэрапеўтычнага аддзялення на 240 ложкаў. Паміж 2 прамавугольнымі ў плане васьміпавярховымі лячэбнымі карпусамі размешчаны трохпавярховы корпус паліклінікі (на 500 наведванняў штодзень) складанай канфігурацыі плана і выразнай аб’ёмна-прасторавай кампазіцыі (архіт. М. Барсукоў). Корпус паліклінікі злучаны з будынкам тэрапеўтычнага аддзялення галерэяй па ўзроўні 3-га паверха. У 1984—1987 гг. пабудаваны 7-павярховы корпус рэўмакардыялагічнага аддзялення, арыентаваны галоўным фасадам да праспекта Незалежнасці (архіт. У. Галіцкі, А. Быкаў).
Літаратура[правіць | правіць зыходнік]
- Т. В. Габрусь, А. А. Міцянін. 160. Комплекс будынкаў 1-й клінічнай бальніцы // Збор помнікаў гісторыі і культуры Беларусі / АН БССР. Ін-т мастацтвазнаўства, этнаграфіі і фальклору; Рэд. кал.: С. В. Марцэлеў (гал. рэд.) і інш. — Мн.: БелСЭ, 1988. — Мінск. — 333 с.: іл. — ISBN 5-85700-006-8.
- Архитектура и градостроительство Советской Белоруссии.—- Мн., 1957;
- Крючок Г. Р., Шуба А. Н. К истории Минской первой клинической больницы.— У кн.: Сб. научных трудов. Мн., 1959.